Dedma

ni Murphy SC Red

(sa mga buhay na tinigpas sa Hacienda Luisita)

                                          Sige lang, dedma lang,
                                          “lupain naman ‘to ng aming angkan,”
                                          uto mo sa sariling gusto mong paniwalaan
                                          maski naming ang akala nyo’y mangmang
                                          gayong malinaw pa sa katanghalian
                                          ng bawat katag-araw na pabuya ‘yan
                                          sa himod n’yo sa tumbong at puwitan
                                          ng mga prayle at gobernador heneral
                                          na sa lupang ninuno ay dantaong kumamkam.

                                          Sige lang, dedma lang,
                                          tutal dugo namin at di inyo ang dilig n’yan
                                          pawis nami’t di inyo ang tumatagas
                                          lakas nami’t di inyo ang pinupuhunang
                                          tumagpas ng tubó at limpak na tubô
                                          na angkan n’yo ang sumasamsam.